SMZ KUINUA VIPAJI VYA WASANII.

Na Miza Kona na Maryam Kidiko-Maelezo Zanzibar.                           

   SERIKALI ya Mapinduzi ya Zanzibar imesema ina lengo la kuinua vipaji vya wasanii wa Zanzibar ili kuhakikisha kuwa kazi zinazotokana na jasho lao zinakuwa sehemu ya ajira kwao ili kuondosha usumbufu wanaoupata..

Hayo ameyasema Naibu wa Waziri wa Habari wa Utamaduni Utalii na Michezo Bihindi Hamadi  Khamis  wakati akijibu suala la Mhe. Wanu Hafidh Ameir  Nafasi za Wanawake aliyetaka kujua kwa namna gani studio ile imewasaidia wasanii wa Zenj fleva kuinua vipaji vyao kama vile studio ya Tanzania  Bara.

Amesema Wizara ya Habari, Utamaduni Utalii  na Michezo  ilijenga studio ya Rahaleo kwa ajili ya Wasanii waliopo Zanzibar wakiwemo Wasanii wa Maigizo, Zenj fleva na wasanii wa Taarab kwa  kuinua vipaji vyao ili kuona kwamba wanafaidika na kuweza kupata ajira.

 “Vifaa vya kurikodia vimefika wiki iliyopita bado vipo uwanja wa ndege kwa hatua ya kuvitoa na mafundi kutoka nje ya nchi watakuja mwisho wa mwezi huu kwa hatua ya kuvifunga na tunatarajia wakimaliza tu studio itaakuwa tayari kufanya kazi ya kurikodi na wasanii wetu watafaidika na kazi zao”, amefahamisha Naibu huyo.

Amefahamisha kuwa serikali inaendelea kuwasaidia wasanii wote waliojisajili katika Baraza la Sanaa kwa kuwapatia mafunzo ya kuendeleza sanaa zao kupitia warsha na semina kwa lengo la kuwapatia ujuzi wa kazi zao katika tasnia yao hiyo.

Ameeleza kuwa serikali kupitia Wizara yake ya Habari Utamaduni na Utalii na Michezo inaendelea kuwaelimisha wasanii wake kusajili kazi zao katika Jumuiya ya Haki miliki (COSOZA) kwa ajili ya kudhaminiwa haki zao za uzeeni.

 PIa Wizara inawapatia wasanii hao taaluma za kufanya kazi zao katika kuandika, kurikodi na kufanya mauzo kwa lengo la kufaidika na sanaa yao hiyo.

Wakati huo huo Baraza la Wawakilishi limepitisha Mswada wa Sheria ya Miradi ya Maridhiano Namba 1ya 1999 na Kutunga Sheria Mpya kwa ajili ya Kuanzishwa na Kuendesha Mashirikiano baina ya Sekta ya Umma na Binafsi na Mambo Mengine yanayohusiana na Hayo.